Unha rúa de San Vicente e o pavillón do Bañadoiro xa levan o nome de Luis Nogueira

Día emotivo para todos os que admiran e queren a Luís Nogueira. A primeira hora da mañá descubríase unha placa e un busto no pavillón do Bañadoiro, en Vilamartín, que desde ese mesmo momento leva o nome do atleta valdeorresés.

Na placa ademais do seu nome, Luís Nogueira Fernández e dos logros mundiais e records conseguidos como lanzador de xavelina unha inscrición, «mellor persoa». Así o certificaba a súa viúva, Ramona Iglesias, ao remate da homenaxe no pavillón, cando se lle preguntaba que lle parecía o acto. Despois de agradecer a honra que se lle estaba a facer fixo ela tamén unha pregunta: «¿Ti coñeces a alguén que che falase mal de Luís?», por suposto a resposta foi un no rotundo.

A súa irmá e ao sobriño e afillado de Luís correspondéronlle os honores de descubrir a placa e o busto realizado conxuntamente por Xelo de Tremiñá e Pablo Deramond, quen tamén realizaron a estatua en bronce e pizarra que se destaparía despois en San Vicente.

Antes, unhas palabras do alcalde de Vilamartín nas que non faltou o eloxio a súa persoa e tamén aos logros como profesional e deportista. Logo tomou a palabra en nome da familia Miguel Ángel Nogueira, afillado e sobriño do homenaxeado, quen deu as gracias, un a un, a todos os que achegaron neste acto.

Tras o acto protocolario unha andaina na que participaron sobre unhas 100 persoas e que os levou a San Vicente pola ruta da Loba da Fada, onde de novo se lle fixo outra homenaxe. Descubriuse unha louxa que nomea unha das rúas da aldea e tamén a estatua situada nunha praza a poucos metros da casa de Luís.

Agradecementos e unhas verbas cantadas de Paco Campos que remataron cunha comida entre todos os que o querían e alí se atopaban.

Neste derradeiro ano foron varíos os recordos que se tiveron para Luís, destacar a exposición sobre o atleta de San Vicente de Leira que levou a súa vía e as súas paixóns por Vilamartín, O Barco ou A Rúa.