O pregón de Escuredo e variedade musical, no Cristo 2016 no Barco

18 de agosto de 2016, 0:16

Cristian Escuredo será o pregoeiro das Festas do Cristo 2016. Anunciouno esta mañá a concelleira de Cultura, Margarita Pizcueta, na presentación do programa, que este ano dura sete días, do 8 ó 14 de setembro. Esta ampliación da celebración débense á apretada axenda do actor e cantante barquense, que ese días se desprazará ó Barco dende Valladolid, onde estará co seu espectáculo Priscilla reina del desierto. Así que o pregón abrirá o cartel das festas o xoves 8 de setembro na Praza Maior.

O que lle seguirá nos seguintes seis días é unha sucesión de actividades para tódalas idades e gustos, sobre todo musicais, encabezando o programa o grupo La M.O.D.A. que actuará o sábado 10. E de quen foi idea? De Juan, un veciño que respostou á chamada da Concellería de Cultura para que se mandasen propostas para as festas. Así o destacou a concelleira Margarita Pizcueta, sinalando que outra veciña pediu música rap e decidiuse contratar o concerto de Sokram, que actuarán ese mesmo día.

A variedade musical é unha das características do programa deste ano, que inclúe o punk de Novedades Carmiña, o soul de Smokey Blue, as baladas de Son do Sil, as versións de Miguel Arias, os cantos de taberna de Pándega e a as bandas do Barco e Compostela entre outros. A outra característica é a aposta pola música local. Ademáis de Son do Sil e Miguel Arias, ambos da comarca, haberá un festival de bandas locais no que participarán Placeres solitarios, SdeRap&Torfy e Big Crunch, que gañaron o concurso do Festival Cultura Quente á mellor maqueta. E onde están as orquestras? Pois a París de Noia actuará o martes e o día grande, o mércores 14, actuará a orquestra Armonía Show.

A concelleira de cultura, Margarita Pizcueta, destacou que decidiron reservar as orquestras para estes días xa que en fin de semana duplicaban a súa tarifa, e con esa diferencia podían organizar máis cousas. No plano deportivo haberá fútbol, coa visita do Deportivo B, atletismo, coa Milla Urbana, e piragüísmo. Este ano, o Descenso do Sil cumpre o seu 50 aniversario e dende o Concello queren celebralo organizando unha festa cos piragüístas que será, o mesmo sábado do descenso, no campo da festa.

A moda das food trucks, tamén no Barco

Rilla no río é o nome do evento que este ano se suma por primeira vez ás Festas do Cristo e que supón un encontro de food trucks (furgóns de comida) con mercado vintage e música. O promotor do evento, José Manuel García, explicou que levan organizado varios en Galicia e León e que o resultado é moi positivo «tamén para os negocios locais, porque moita xente se anima a xantar fóra e dinamiza o espazo da festa». García destacou que virán entre dez e doce furgonetas e priorizarán a gastronomía da zona nos menús que ofrezan. Xunto ás furgonetas haberá música e un mercado vintage e de artesanía ó que asegura que invitaron a deseñadores da comarca: «Arredor das furgonetas sempre se crea moi bo rollo e procuramos unha integración co mercado local».

A presenza desta comida de rúa será sen dúbida unha das novidades da paisaxe festiva do Cristo, e neste senso a concelleira de Cultura lanzou un reto: «Gustaríanos que algún hostaleiro local se animase a crear unha boteloneta e ofrecer tapas ou pratos típicos de aquí». Sen querer «rompre tradicións», Pizcueta tamén destacou que a presenza de comida na rúa está pensada para que a xente estea na festa «da mañá á noite» e ninguén teña por que pasar as festas cociñando na casa.

A que sigue é a programación completa por días: