O Barco celebra un Entroido cheo de cor, música e diversión

O Barco de Valdeorras viviu un Entroido espectacular cun desfile que percorreu as rúas desde a zona do Hospital ata a Praza Maior, enchendo o ambiente de alegría e moita cor. O evento contou coa participación de máis de 600 persoas distribuídas en 22 comparsas, ademais dun público entregado, moitos deles tamén disfrazados.

A saída tivo lugar, pasadas as sete e media da tarde, desde o Hospital Comarcal, co ritmo marcado pola charanga Os Pendellos. Tal e como asegurou a concelleira de Cultura nunha entrevista previa realizada por Ana Domingo para o espazo "+d1" dedicado ao Entroido, "a marcha está garantida". Ao finalizar o desfile, na Praza Maior, entregáronse os premios aos mellores disfraces e a música continuou coa sesión dos DJ Fru e DJ Barrancas.

A charanga abriu o desfile animando a festa, seguida polos Minións do colexio Otero Pedrayo de Viloira, cos máis pequenos viaxando nun remolque. Este non foi o único grupo que escolleu este disfraz, pois a ANPA Julio Gurriarán e Condesa de Fenosa tamén se sumaron á onda amarela.

Outro dos disfraces máis populares foron os coches de choque, que estiveron representados polas comparsas de Cógomo e Morea. Pola súa parte, a ANPA do colexio Divina Pastora apostou pola temática romana, desfilando baixo o estandarte "Legio Guigurros".

Un dos grupos máis animados foi "Os Nasarre", que homenaxearon a Eva Nasarre, a icónica presentadora que puxo a España a facer ximnasia nos anos 80. Con maillots, medias de cores e calentadores, fixeron unha demostración de que están en forma xa que non pararon de facer coreografías todo o treito.

A comparsa máis colorida foi sen dúbida "Figueira Circus" de Rubiá, que fixo malabares, xirou pratos chineses e puxo a cantar ao público con cancións dos Payasos da Tele. Tampouco faltaron o son e o ruído do Folión "Os Arrieros", mentres que "Os Plátanos" de Asfabal, cunha casete portátil, fixeron unha versión máis silenciosa pero igualmente festiva.

Outras comparsas destacadas foron "Avellas en Loita, Invasoras Fóra!", que fixeron referencia ás velutinas, e "Trangalladas", onde os participantes se disfrazaron de lámpadas, mesas camilla e outros elementos do fogar. "Sementando Sorrisos" apostou pola temática floral, enchendo o desfile de xardíns ambulantes.

O Club Natación Valdeorras protagonizou unha divertida clase maxistral sobre as diferentes modalidades de natación, mentres que a Asociación de Mulleres O Teixadal sorprendeu montando a lombos de pelícanos.

Por último, non faltou o lonxano Oeste, cun grupo caracterizado á perfección, incluíndo algún que outro pistoleiro "buscado".

O Entroido do Barco 2024 volveu demostrar que a festa, a imaxinación e o bo humor seguen máis vivos ca nunca.