O Vianariño Futsal continúa a dar pasos firmes no seu proceso de crecemento. Tras acadar un histórico ascenso á Terceira División Nacional, o club afrontou unha tempada esixente na que o principal obxectivo era manter a categoría, algo que, a nivel deportivo, considera cumprido, aínda que queda pendente dos arrastres.
O seu presidente, Víctor Ferreño, fai un balance positivo do curso: «era un ano moi ilusionante. Ascendemos a unha categoría nacional, que xa son palabras maiores para un sitio como Viana do Bolo e Vilariño de Conso, e desfrutamos moito da experiencia».
O equipo masculino rematará a liga na décimo terceira posición, tras unha tempada marcada polas lesións e un inicio complicado. «Non se nos deu todo o ben que queriamos ao principio, pero fomos recuperando xogadores e gañando partidos importantes. A nosa parte fixémola, agora só queda esperar», sinala.
O feminino medra e colle protagonismo
Se no masculino toca agardar, no feminino as novas son especialmente positivas. O equipo segue medrando e asentándose, como demostra a recente vitoria no derbi ante A Gudiña.
«É un equipo novo, ao que lle custou ao comezo, pero agora está nunha posición cómoda na táboa e dando bos resultados», explica Ferreño, quen destaca tamén a importancia da canteira: «xa empezan a chegar xogadoras das categorías inferiores, e iso é fundamental».
Un club novo… con oito equipos
A evolución do Vianariño é notable tendo en conta a súa curta traxectoria. En apenas uns anos pasou de ser un proxecto modesto a contar cunha ampla estrutura deportiva.
«Comezamos cun grupo de amigos e agora temos oito equipos, cun feminino, un xuvenil en Preferente e todas as categorías inferiores», resume o presidente. Un crecemento que se apoia na base e na implicación da contorna.
A pesar das dificultades, especialmente pola saída de xogadores para estudar fóra, o club mantén unha liña de traballo clara: «temos rapaces novos que veñen empurrando moi forte e que nos van dar moitas alegrías».
Cambio no banco e espírito de familia
Outro dos momentos clave da tempada foi o relevo no banco do primeiro equipo, coa chegada de Anxo Macía no lugar de Xocas Miranda. «Foi un cambio natural. Anxo é xente da casa, preparouse moito e ten un gran futuro. Xocas tamén foi moi importante para nós. Ao final, somos unha familia e todos suman», afirma Ferreño.
E é precisamente ese ambiente o que define ao Vianariño, tanto dentro como fóra da pista. «Somos dous pobos pequenos, pero moi unidos. No pavillón xúntase todo o mundo, familias, xogadores, adestradores… hai un ambiente espectacular».
Mirando ao futuro con ilusión
De cara á próxima tempada, o obxectivo pasa por consolidarse na Terceira División e seguir fortalecendo a estrutura do club. «Estamos nunha categoría na que nos sentimos cómodos. Se nos respectan as lesións, podemos asentarnos aí», asegura o presidente.
Mentres tanto, o Vianariño segue construíndo algo máis que resultados: un proxecto deportivo e social que medra coa forza da canteira e co apoio dunha afección que xa se sente parte dunha gran familia.
