«Esperamos ter unha vendima de calidade»
Estamos chegando ao final deste oitavo mes do ano e Valdeorras xa comeza a ultimar os preparativos para comezar a vendima. Con este motivo puxémonos en contacto con Joaquín Sánchez, xerente da adega Alán de Val, que desvela os detalles sobre a colleita deste ano. A maiores, tamén sinala o recente premio obtido polo viño Pedrazais Godello 2023.
Segundo comunicaban dende a Denominación de Orixe de Valdeorras, a colleita verase atrasada unha semana respecto ao ano pasado. Sánchez puntualiza que dende a bodega aínda non se fixeron mostraxes en campo, «comezaremos a partir do 25 de agosto».
A pesar de aínda non habelos feito, polo que observa nos viñedos calcula que «unha semana ou 10 días é posible que atrase». Isto non é algo axustado a realidade, xa que quen marca estes tempos é a propia uva.
Nas colleitas existen varios factores, por exemplo, a meteoroloxía ou a carga da uva. «Este ano hai unha colleita que parece abundante», explica. A época primaveral estivo marcada polos grandes chuvascos e o gran coidado que tiveron dende as adegas cos tratamentos, «pero superada esta etapa esperamos unha vendima de calidade». Joaquín móstrase «contento» con esta nova campaña.
A orografía de Valdeorras marca os tempos de maduración. En terras altas sempre se realiza a vendima 10 días en comparación «co val da Rúa». No caso da adega Alán de Val a viña de Pedrazais, a máis antiga da cooperativa que data do ano 1990, é a primeira na que se realiza a colleita.
Os premios de Alán de Val
Pedrazais Godello 2023 acaba de ser premiado cun Arribe de Ouro no certame internacional de viños Premios Vinduero-Vindouro. Con esta mesmo caldo, recibiron un recoñecemento «importante» que realiza a Unión Española de Catadores, o Baco de Oro. «Cando xa se repiten os premios é que é un viño dunha calidade destacable», matiza Sánchez.
A maiores, Alán de Val Mencía obtivo o premio a mellor tinto de Galicia. «A garnacha que procede das ladeiras de Pedrazais» tamén se fixo cun primeiro premio na Feira do Viño.