Iván Pérez, Córgomo: «Gústame mirar cara a arriba, quero ascender»
A de Iván Pérez (O Bolo, 2002) é unha das primeiras catro fichaxes que realizou esta temporada o Córgomo, que volve á carga cun ambicioso proxecto tras unha gran estrea na Primeira Futgal, quedando preto dos postos de promoción na súa primeira campaña nesa categoría.
Dende a directiva do club verdibranco apostan polo potencial goleador de Pérez para reforzar o apartado ofensivo do equipo que adestrará Iván González, a quen o dianteiro coñece ben, pois xa coincidiron no CD Barco: «Cando eu estaba en xuvenís do Barco, el deume a posibilidade de estar co primeiro equipo e gárdolle un especial cariño; sempre quixen que me adestrase», asegura o futbolista.
Pérez asume o reto ilusionado e xa conta os días para volver ao verde, neste caso do Bañadoiro. «Seguramente o Córgomo volva estar arriba, xa o demostrou a temporada pasada, e iso foi un dos motivos que me levou a asinar», conta a SOMOS COMARCA.
A pasada temporada, Iván Pérez rematou entre os máximos goleadores da Primeira, con 13 goles en 23 encontros, malia sufriu unha lesión que o apartou dos terreos de xogo antes de tempo e aínda que o seu equipo, o Viana, acabou descendendo a Segunda. «En case todos os partidos lograba atopar portería e esta próxima temporada espero mellorar os números», explica o dianteiro.
Sobre os obxectivos que se lle presentan esta nova campaña coa camiseta do Córgomo, o xogador natural do Bolo sinala que deben «ir con cabeciña e pouco a pouco, pero se podemos acceder a play-off ou mesmo acabar de primeiros, benvido sexa. Son un xogador ao que lle gusta mirar cara a arriba, e eu quero ascender. No individual, quero marcar os máximos goles posibles para axudar ao Córgomo».
Xunto con Iván Pérez, xa chegaron ao Córgomo Poli Romero, que comparte posición co anterior; Adri Iglesias, porteiro; o veterano Yosu, que actúa como central e acumula ás súas costas unha longa carreira, e tamén renovou Gorka Murciego. Trátase sen dúbida dun proxecto ambicioso que aínda podería deixar algunha sorpresa: “Iso non me corresponde a min dicilo, pero algo máis haberá”, di Pérez.