A directora territorial de Emprego da Xunta de Galicia, Marta Vázquez Guzmán, acompañada polos alcaldes do Barco de Valdeorras, Alfredo García; Vilamartín, Enrique Fernández Barreiro; e Petín, Raquel Bautista, clausurou o Obradoiro de Emprego "Valdeorras Embelece III". Durante o último ano, este programa formou a 20 persoas desempregadas en dúas especialidades: 12 participantes en viveiros, xardíns e centros de xardinería e 8 en traballos de carpintería e moble.
O equipo docente estivo composto por un director, dous profesores de xardinería, un de carpintería, un formador dual e un administrativo, que guiaron aos alumnos nunha formación que combinou teoría e práctica, desenvolvendo proxectos que beneficiaron á comunidade.
O alcalde do Barco, Alfredo García, destacou que esta formación abre novas oportunidades laborais e impulsa o emprendemento. Pola súa banda, o rexedor de Vilamartín, Enrique Fernández Barreiro, eloxiou o traballo do profesorado e do equipo directivo, subliñando a evolución positiva en cada edición. A alcaldesa de Petín, Raquel Bautista, tamén felicitou aos participantes e salientou a calidade das melloras realizadas nos tres concellos.
Durante o obradoiro, no Barco realizouse o acondicionamento de zonas axardinadas, a instalación de valados en parques infantís e a renovación de bancos en espazos públicos. En Vilamartín, engadíronse tarefas como a mellora de xardíns en varios núcleos. En Petín, ampliouse e acondicionouse o Paseo do Malecón e realizouse o mantemento de zonas verdes.
A directora territorial de Emprego subliñou que este obradoiro forma parte dos 23 proxectos desenvolvidos este ano na provincia de Ourense, situando a Ourense como referente en Galicia. Ademais, anunciou o inicio de 27 novos obradoiros cun investimento de 14 millóns de euros. Por último, animou aos participantes a acudir ao Polo de Emprendemento do Barco para explorar novas oportunidades de inserción laboral.
O Obradoiro de Emprego Valdeorras Embelece III contou cunha subvención de 531.000 euros da Consellería de Emprego, ademais de 12.000 euros en incentivos para a contratación.
