A Veiga soou a Entrudio no gran peche provincial da VIII Xuntanza de Fulións

A Veiga volveu demostrar este sábado que o Entrudio tradicional latexa con forza no oriente ourensán. A VIII Xuntanza de Fulións reuniu 16 fulións e 7 grupos de máscaras nun desfile multitudinario que converteu a vila no epicentro provincial da tradición.

Desde primeira hora da tarde, o ambiente festivo xa se respiraba nas prazas coa feira de produtos locais e artesanía.O Fulión da Veiga abriu o desfile desde a rotonda de entrada, marcando o ritmo dun percorrido que encheu a Rúa Nova e o Campo da Feira de sonoridade ancestral.

Bombos, aixadas e utensilios agrícolas marcaron o compás dunha tarde intensa na que se sucederon agrupacións chegadas de distintos puntos da provincia. As Pantallas de Xinzo, o “Oleiro”, os Cabreiros, os Vellarróns, os Felos e tantos outros grupos achegaron diversidade e simbolismo a unha celebración que transcendeu o puramente festivo.

A presenza de máis de 800 participantes confirmou o crecemento dun encontro que xa é referencia no calendario do Entroido tradicional. Cada paso do desfile foi tamén unha reivindicación do patrimonio cultural inmaterial, transmitido de xeración en xeración e mantido vivo grazas ao compromiso colectivo.

O redroble chegou co tradicional peche da “Morte”, acto simbólico que escenificou o final do Entrudio ata o vindeiro ano, entre aplausos e complicidade veciñal.

A xornada continuou coa cea compartida entre os grupos e coa música da noite, prolongando un ambiente de convivencia que define esta celebración.

Coa VIII Xuntanza de Fulións, A Veiga non só pechou o Entrudio provincial, senón que reafirmou o seu papel como referente na defensa e dinamización da tradición no territorio de Trevinca. O son dos bombos apagouse ao caer a noite, pero quedou no aire a certeza de que o Entrudio segue máis vivo ca nunca.

Tu prueba Premium ha finalizadoTu prueba Premium ha finalizadoTu prueba Premium ha finalizadoTu prueba Premium ha finalizado