Un accidente de tráfico rexistrado este domingo, 24 de agosto, ás 13.00 horas deixou un balance de tres persoas feridas na estrada OU-0804, que une O Covelo coa Veiga. O sinistro produciuse á altura do punto quilométrico 10, nas proximidades da Praia dos Franceses e do Hotel As Chairas.
Segundo informou o 112 Galicia, tratouse dunha colisión por alcance na que se viron implicados tres vehículos. As tres persoas feridas foron trasladadas ao centro médico de referencia para recibir asistencia sanitaria.
A alerta foi dada ao Centro Integrado de Atención ás Emerxencias (CIAE-112), que de inmediato mobilizou ao servizo de urxencias sanitarias 061, ao GES da Veiga, a Protección Civil da Veiga e á Garda Civil de Tráfico, que se desprazaron ao lugar dos feitos.
