Xosé Manuel Merelles: «Valdeorras é un territorio con un gran potencial turístico. O que nos falta é crelo»
Xosé Manuel Merelles dirixe desde hai uns días a Axencia Turismo de Galicia. É bo xornalista, amante da súa terra, pero sobre todo boa persoa. Implícase cos proxectos e coa xente que os rodea.
Coñece ben a comarca e sabe do seu potencial turístico, aínda que admite que queda moito por facer e por amosar. «Son un namorado do xornalismo, pero ante todo son un namorado de Valdeorras», confesa na entrevista que lle concedeu a Radio Valdeorras Onda Cero e Somos Comarca nestes primeiros días no cargo.
Di que os obxectivos para o turismo galego pasan pola sostenibilidade da actividade turística «algo innegociable», a dixitalización dos procesos e por afondar na internacionalización —só un 25% dos que visitan Galicia por motivos turísticos son de fóra de España—. «Cabe afondar nestes procesos de internacionalización para captar máis visitantes estranxeiros».
En canto á comarca, Merelles é un gran coñecedor dela, por iso non dubida en sinalar que «Valdeorras é un territorio cun gran potencial turístico. O que nos falta é crelo». O enoturismo, a gastronomía, o patrimonio cultural, a natureza e o turismo industrial son obxectivos sobre os que hai que traballar.
Como el mesmo apunta, a comarca «ten una gran proxección no tema dos viños; agora mesmo os brancos de Valdeorras están posicionados como os mellores de España». Por iso entende que é necesario «afondar no enoturismo, con ese potencial de adegas que temos e de servizos gastronómicos. Creo que hai bastantes vimbios para ser un gran produto».
Desde hai uns anos as covas de Valdeorras son un valor en alza e tanto o novo director de Turismo como a súa predecesora, Nava Castro, son bos sabedores desa realidade. «Temos cousas que son únicas, as covas, que a todo o mundo lle fascinan. A miña antecesora quedou prendada das de Seadur»
O patrimonio cultural é «importantísimo e pode focalizarse nas Ermitas. Por aí pódese xerar una vía de peregrinaxe a esta zona», resalta. O turismo monumental sería outra das apostas para potenciar o turismo.
Sen dúbida se o director da Axencia de Turismo tivese que elixir a súa preferencia sería a natureza e a paisaxe. «Fai falta racionalizar algunhas cousas: ter rutas de sendeirismo homologadas, apostar polo cicloturismo», asegura. E engade: «Todo está aí. Hai uns cimentos, uns alicerces que só fai falla desenvolver».
Sabedor que o Camiño de Inverno é outro dos potenciais turísticos da zona, sinala que fai falta «unha labor de crer que o Camiño é algo importante e un patrimonio interesantísimo para nós». «Estase a coñecer moito e a xente valora o tramo entre Ponferrada e Lalín como algo impresionante».
Sostén que hai que dotalo de infraestruturas pero «todo leva o seu tempo». «Hai que facer un traballo de promoción que nos tocará facelo desde aquí e tamén desde os concellos».
Outro apartado fundamental e o turismo industrial «probablemente» se reunirá pronto co Clúster da Pizarra para abordar o tema. «É outro potencial que ten a comarca. Ten una multioferta que cómpre obxetivizar e comercializar».
Dentro deste tipo de turismo tamén inclúe as centrais hidroeléctricas que noutro tempo, ao igual que hoxe é a pizarra, foron o motor económico da comarca e até da provincia. «As instalación senlleiras da central de bombeo de Santiago ou a de Manzaneda tamén forman parte do turismo industrial».
O turismo son experiencias, son relatos. «A nosa comarca ten un relato estupendo en canto a enerxías sostibles. E as pizarras tamén teñen un relato, una historia que é única nosa». Conclúe que hai que darlle «papel a ese relato e carrete e seguro que facemos un bo produto».
Se queres escoitar a conversa con Xosé Manuel Merelles en +D1 Valdeorras, fai clic na seguinte ligazón: