O Concello da Rúa dá a benvida ao Nadal cunha completa programación que busca dinamizar o comercio local, fomentar o espírito festivo e ofrecer alternativas de ocio para veciños e visitantes. A alcaldesa, María González Albert, destaca o esforzo colectivo que envolve cada iniciativa e anima á veciñanza a participar nas múltiples actividades que se desenvolverán durante as festas.
Un Nadal cheo de luz e participación
A segunda edición do Concurso de Decoración de Nadal xa está en marcha. «É unha oportunidade para que calquera persoa, asociación, bar ou vivenda se implique no espírito do Nadal e axude a xerar ese ambiente máxico que caracteriza estas datas», sinala González Albert. Agradecendo especialmente o labor da Asociación San Cristóbal e a decoración institucional, a rexedora subliña a importancia de que a veciñanza se involucre directamente nesta iniciativa.
Outra proposta destacada é o programa “Eu Merco na Rúa”, que busca incentivar as compras no comercio local. Por cada compra superior a 15 euros, os clientes recibirán un vale para participar nun sorteo de 20 premios de 50 euros para gastar no comercio da vila. «É unha forma de recoñecer e apoiar o tecido comercial que dá vida ao noso municipio», engade a alcaldesa.
Programación variada para todos os gustos
A programación inclúe actividades para todos os públicos, especialmente para os máis pequenos. Entre elas:
- O Apalpador (20 de decembro): Con colaboración das Asociacións A Ruada e Abertal, percorrerá as rúas ata rematar no Concello.
- Cabalgatas máxicas: O día 24, organizada pola Asociación San Cristóbal, e a tradicional cabalgata de Reis o 5 de xaneiro, da man da Asociación A Ruada.
- Teatro e festa: O 22 de decembro, A Ruada presenta unha sesión de teatro no Centro Cultural Avenida. O 28, a Asociación Sabugueiro organiza a popular Festa da Empanada de Costrelas, en colaboración co Concello.
Os máis pequenos tamén poderán gozar de inchables no pavillón entre o 2 e o 7 de xaneiro, mentres os amantes do deporte terán dúas citas importantes: a Carreira de Nadal o 29 de decembro, acompañada dunha foodtruck de Galicia sabe amar, e o Campionato Absoluto de Cross o 4 de xaneiro, ambos organizados polo Club Adas.
Unha despedida de ano inesquecible
O 31 de decembro, A Rúa despedirá o ano cun brindis colectivo na praza, a partir das 19:00. Non faltará a música, o cava de Almendralejo e algunha sorpresa para celebrar a chegada do 2025 con alegría.
Si desexa escoitar a entrevista completa pode facelo aquí:
