Despois de máis de 20 anos de reivindicacións e esforzos colectivos, a construción do novo centro de saúde da Rúa comeza a facerse realidade. A alcaldesa, María González Albert, anunciou que a empresa encargada da obra xa asinou a acta de replanteo. «Estes días colocarán as casetas e a pechar a zona», explica. Segundo informou, a próxima semana está previsto o inicio dos movementos de terra, o primeiro paso para a súa instalación.
«A construción deste centro é unha necesidade urxente», asegurou, lembrando que o actual edificio non cumpre cos requisitos mínimos. A pesar da satisfacción polo inicio das obras, a alcaldesa insistiu en que «o importante non é só o edificio, senón que estea ben dotado de persoal e recursos para atender á nosa poboación».
Este proxecto contemplaba un centro con tres facultativos e tres consultas de medicina xeral, pero a realidade actual é que xa se dispoñen de catro en cada unha destas áreas. «Seguiremos moi pendentes para que estas necesidades queden reflectidas no novo centro», asegurou.
O prazo de execución previsto é de 16 meses, sempre que non haxa imprevistos. Albert tamén quixo destacar o papel clave do persoal sanitario actual na loita por mellorar as instalacións. «Foron sempre a cara visible desta reivindicación, que en realidade leva máis de 20 anos. O noso centro de saúde non tiña nin elevador ata hai apenas oito ou nove anos, o que dificultaba o acceso ás consultas do primeiro andar, incluíndo pediatría, odontoloxía e dous médicos de familia».
