A forte tormenta rexistrada na tarde do sábado volveu poñer en evidencia os problemas do Regueiro dos Fornos ao seu paso por Fontei. O curso de auga, canalizado desde hai anos, acabou recuperando o seu antigo percorrido tras producirse un colapso na canalización, provocando a inundación de dúas vivendas que xa se viran afectadas nun episodio similar o pasado 26 de abril.
O incidente produciuse mentres o barrio celebraba as festas de San Antonio, unha cita moi concorrida do calendario festivo da Rúa. A intensa chuvia fixo que a auga se acumulase na canalización ata formar unha gran bolsa que, ao liberarse de forma repentina, baixou con enorme forza cara ás zonas habitadas.
Antonio Nogueira Fernández, coñecido por todos como «Chapi», foi unha das persoas que viviu o episodio en primeira persoa. Segundo relata, ao comprobar que a auga comezaba a embalsarse decidiu abrir varias arquetas e retirar pedras e restos acumulados na parte superior do regato para facilitar a entrada da auga nos tubos.
«Parecía que estaba desaugando ben, pero de repente empezou a subir a auga como se rebentase unha presa debaixo da autovía», explica. Nese momento atopábase acompañado polo seu xenro e outro veciño. «Tivemos que saír correndo coa auga detrás nosa. Se tardamos vinte metros máis, collíanos», relata.
A avenida de auga arrastrou paus, barro e pedras, volvendo afectar ás hortas e baixos das vivendas situadas na zona máis próxima ao antigo couce natural do regato.
«Inundouse outra vez o meu baixo e con moita máis forza ca na anterior ocasión», asegura Chapi, quen lamenta tamén a perda das patacas que xa foran danadas durante a inundación de abril.
Os veciños apuntan a que a acumulación de lodos e sedimentos na parte alta da canle está reducindo a capacidade de evacuación da auga. Segundo explican, algunhas zonas quedaron practicamente á mesma altura que os arrastres de terra acumulados nos últimos meses, favorecendo a formación de tapóns cando se producen episodios de choiva intensa.
A situación obrigou de novo a realizar labores de limpeza de urxencia nas arquetas e puntos de drenaxe para evitar que a auga continuase acumulándose.
Mentres tanto, os afectados reclaman unha solución definitiva para evitar que o Regueiro dos Fornos siga converténdose nun problema cada vez que se rexistran tormentas intensas, especialmente nun punto onde a auga xa demostrou en dúas ocasións este ano a súa capacidade para recuperar o antigo percorrido que seguía antes da súa canalización.
Vídeos cedidos por Antonio Nogueira
