O PP esixe ao Goberno a restitución das paradas do AVE na Gudiña antes de setembro

«Non poden permanecer impasibles». Así de contundentes se mostran os deputados ourensáns do Partido Popular no Congreso, Celso Delgado, Ana Vázquez e Rosa Quintana, que acaban de presentar unha nova iniciativa parlamentaria co obxectivo de que se restitúan as paradas do AVE na estación Porta de Galicia, na Gudiña. Reclaman que Renfe e o Goberno actúen con urxencia e que os novos horarios estean operativos a principios de setembro.

A medida responde, segundo lembran, ao clamor expresado o pasado 2 de agosto por máis de 6.000 persoas que se manifestaron na localidade en defensa do tren, nunha protesta promovida pola plataforma “Dereito ao Tren”. «A unidade política quedou acreditada dun modo patente», asegura Delgado, en referencia á presenza de representantes de todas as formacións políticas, incluíndo aos presidentes do Parlamento galego e da Deputación de Ourense, conselleiros, altos cargos da Xunta, senadores, alcaldes e concelleiros.

Os populares preguntan ao Goberno se ten previsto dar marcha atrás na decisión adoptada o 9 de xuño, cando se implantaron novos horarios do AVE que suprimiron 16 trens con parada na Gudiña. Aseguran que esta medida «pon en grave risco a igualdade de oportunidades no rural» e reclaman «servizos racionais e útiles que aseguren o dereito á mobilidade, sen discriminacións cos usuarios das grandes cidades».

«Todos os que alí démonos cita esiximos horarios que respondan ás necesidades da veciñanza das seis comarcas afectadas e igualdade de condicións con outros territorios e estacións de orixe», incide Delgado.

O PP lembra que a estación da Gudiña é unha infraestrutura clave no corredor ferroviario entre Galicia e Madrid e que a súa exclusión supón unha fenda máis entre o medio urbano e o rural. Por iso, reclaman que Renfe comece xa coa planificación de novas frecuencias e poña os billetes á venda canto antes.