Ourense pecha 2025 con 2.879 títulos de familia numerosa en vigor

Galicia alcanzou ao remate de 2025 un novo récord no número de títulos de familia numerosa en vigor, con 32.750 acreditacións activas a 31 de decembro. A cifra supón 1.531 títulos máis que un ano antes, o que representa un incremento do 4,9 %.

Na provincia de Ourense contabilizábanse ao peche do exercicio 2.879 títulos en vigor, mentres que ao longo de 2025 se expediron 1.184 novas acreditacións.

A Coruña concentra o maior número de títulos activos, con 13.886, seguida de Pontevedra, con 12.901; Lugo, con 3.084; e Ourense. En canto ás novas expedicións realizadas durante o ano, A Coruña rexistrou 4.926, Pontevedra 4.717, Lugo 1.203 e Ourense 1.184.

Do total de títulos vixentes en Galicia, 28.638 corresponden á categoría xeral, o 87,4 %, e 4.112 á categoría especial, que representa o 12,6 %.

Beneficios para as familias

O recoñecemento da condición de familia numerosa permite acceder a diferentes vantaxes e programas de apoio. Entre eles figuran deducións fiscais, beneficios en materia de educación e conciliación, axudas de vivenda, bonificacións no transporte e descontos a través do Carné Familiar Galego.

Desde a Xunta sinalan que o incremento consolida a tendencia ascendente dos últimos anos e reflicte o aumento do número de familias que teñen recoñecida esta condición na comunidade.