Eva Arias: «Se algún día me arrancan desta terra, sangrarei viño»
A Festa das Covas de Vilamartín xa está en marcha. A tradicional «Pequena», reservada para os coveiros e que cada ano serve de antesala á gran festa do sábado, reuniu este venres a centos de persoas entre viño, petiscos e música, nun ambiente amenizado por tres charangas, que percorreron as covas acompañando aos asistentes mentres compartían mesa, conversa e brindes.
O momento máis significativo da tarde chegou co pregón pronunciado pola atleta e política Eva Arias, que converteu a súa intervención nunha auténtica declaración de amor á terra que a viu medrar.
«Non vos vou enganar cando vos digo que me sinto moi orgullosa de ter o privilexio de ser a pregoeira destas festas, porque aquí, no Concello de Vilamartín de Valdeorras, é onde me criei», comezou dicindo ante veciños e coveiros, agradecendo á Asociación de Coveiros a confianza depositada nela para abrir esta XXVIII Festa das Covas.
Durante o pregón, Arias lembrou a súa infancia en San Miguel de Outeiro, asegurando que, por moi lonxe que a leven a súa vida profesional e persoal, Vilamartín seguirá sendo sempre o lugar ao que quere volver.
«Aquí podo ser a Eva máis auténtica de todas», afirmou emocionada, antes de lembrar á súa familia e, de maneira especial, ao seu padriño Pedro, coveiro e gran coñecedor dunha tradición que segue moi presente na súa memoria.
A atleta utilizou tamén unha fermosa metáfora vinculada á viticultura para falar das persoas. Comparou as raíces dunha vide coas das familias e agradeceu aos seus pais «a púa» que lle enxertaron, a que lle permitiu construír unha carreira deportiva na que conquistou máis de vinte medallas nacionais e numerosas internacionalidades coa selección española, sen esquecer nunca de onde procede.
«Os nosos viños son os mellores embaixadores»
O viño foi outro dos grandes protagonistas do seu discurso. Eva Arias reivindicou a calidade dos viños de Valdeorras e pediu aos veciños que deixen de restar importancia ao que se produce na comarca.
«Ás veces temos que deixar un pouco de lado esa modestia que nos caracteriza e darlle ás cousas a importancia que realmente teñen», afirmou, convencida de que variedades como o godello e a mencía son xa referentes internacionais.
Como exemplo contou unha anécdota vivida durante unhas xornadas en Logroño, onde, tras participar nunha cata de viños, defendeu diante dos asistentes que «como o godello da Denominación de Orixe Valdeorras non hai outro», provocando que incluso os organizadores acabasen recoñecendo a calidade dos viños da comarca.
As covas, moito máis ca un lugar para beber viño
No seu discurso tamén puxo en valor o papel das covas como espazos de encontro e convivencia. «As covas son os nosos centros socioculturais», afirmou entre sorrisos, lembrando que nelas se compartiron segredos, se pecharon acordos e conviviron distintas xeracións moito antes de que existisen palabras como coworking ou refuxios climáticos.
Arias asegurou que este patrimonio forma parte da identidade de Vilamartín e mesmo chegou a afirmar que algún día as covas e a súa festa «merecen ser Patrimonio Cultural da Humanidade», facendo un chamamento a conservar esta tradición e transmitila ás novas xeracións.
«Se algún día me arrancan desta terra, sangrarei viño»
O pregón concluíu cunha das frases que máis aplausos espertou entre o público. «As miñas raíces son desta terra. Se algún día me arrancan dela... sangrarei viño», proclamou antes de pedir varios vivas para os veciños, os coveiros, o viño e a Festa das Covas.
Dobre homenaxe na «Pequena»
A celebración serviu tamén para render homenaxe a dúas persoas moi vinculadas á festa, un como colaborador e outo coma coveiro.
A Asociación de Coveiros distinguiu ao exalcalde Enrique Álvarez Barreiro, ao que definiu como un colaborador incansable da Festa das Covas, e ao coveiro Agustín Fernández Núñez, un recoñecemento que foi recollido polo seu irmán Andrés ao non poder asistir ao acto.
Co pregón, as homenaxes e o ambiente festivo da «Pequena», Vilamartín abriu oficialmente unha nova edición da Festa das Covas, que este sábado volverá reunir milleiros de persoas arredor do viño, da gastronomía e dunha tradición que continúa sendo un dos grandes sinais de identidade do municipio.