Marcos Martínez asume a presidencia do PP de Viana do Bolo cunha chamada á unidade para recuperar a alcaldía en 2027

O Partido Popular de Viana do Bolo celebrou o seu congreso local, unha cita que concluíu coa elección de Marcos Martínez como novo presidente da agrupación local tras un proceso no que concorreron dúas candidaturas, a súa e a encabezada por Carmen Conde.

O presidente provincial do PP de Ourense, Luis Menor, foi o encargado de clausurar o encontro, no que lanzou unha clara mensaxe de unidade e colaboración para afrontar os retos que ten por diante o partido no municipio.

«Agora toca remar xuntos coa mesma forza e convicción», afirmou Menor, quen insistiu en que o principal obxectivo dos populares debe ser recuperar a alcaldía de Viana do Bolo nas eleccións municipais de 2027 e facelo coa confianza «maioritaria e rotunda» da veciñanza.

O líder provincial destacou o carácter participativo do proceso, sinalando que a existencia de dúas candidaturas demostra que «en Viana hai ganas de traballar polo PP e polo municipio». Neste sentido, cualificou o congreso como «exemplar» pola actitude mantida polos dous candidatos e polas reiteradas chamadas á unidade realizadas ao longo da xornada.

Menor tamén quixo dirixirse directamente aos dous protagonistas do proceso interno. A Marcos Martínez lembroulle que, como candidatura vencedora, «ten a obriga de ser xeneroso coa outra opción», mentres que a Carmen Conde lle pediu que corresponda ao ofrecemento de integración realizado desde a nova dirección local.

Para o presidente provincial, unha vez rematado o congreso «só existe un único proxecto: o Partido Popular de Viana do Bolo», unha organización que deberá centrarse en recuperar o goberno municipal tras a moción de censura que en setembro do pasado ano permitiu ao PSOE e ao BNG asumir a alcaldía.

Durante a súa intervención, Menor foi crítico coa xestión do actual executivo local, ao considerar que ambas formacións «se dedicaron a facer unha oposición destrutiva» e que a actual coalición responde máis a unha alianza de intereses que a un proxecto de futuro para o municipio.

Pola súa banda, Marcos Martínez agradeceu a confianza depositada pola militancia e asegurou que afronta esta nova etapa como unha responsabilidade máis que como un cargo.

«Agora toca traballar máis, escoitar máis e estar máis preto dos afiliados, dos simpatizantes e dos veciños», afirmou o novo presidente local, quen asegurou que a prioridade será fortalecer o partido, ampliar a súa base social e recuperar a confianza maioritaria da cidadanía.

Martínez quixo facer especial fincapé na necesidade de construír un proxecto integrador e anunciou que a composición definitiva da executiva local permanecerá aberta para facilitar a incorporación das persoas que formaban parte da candidatura encabezada por Carmen Conde. «Comeza unha nova etapa onde todos suman e todos son necesarios», subliñou, apostando por un modelo de partido baseado na colaboración interna e na unidade de cara aos desafíos electorais dos próximos anos.

O congreso local do PP de Viana do Bolo pechouse así cunha mensaxe compartida de cohesión e coa vista posta xa nas eleccións municipais de 2027, nas que os populares aspiran a recuperar a alcaldía do municipio.