Berta Ojea e Laura Seara analizarán en San Xoán de Río o papel das mulleres na historia do cine

O Concello de San Xoán de Río organiza o vindeiro 5 de agosto, ás 11.00 horas, na Casiña Azul, o almorzo-coloquio «As mulleres no cine. Unha ollada feminista», unha cita que reunirá á actriz Berta Ojea e á exsecretaria de Estado de Igualdade Laura Seara para reflexionar sobre a presenza das mulleres na industria audiovisual.

Ao longo do encontro abordarase a evolución do papel feminino no cinema, os avances acadados nas últimas décadas e os retos que aínda persisten nun sector con gran capacidade para influír na forma de entender a sociedade.

Berta Ojea, unha das actrices galegas con maior traxectoria no audiovisual e no teatro, achegará a súa experiencia profesional e o seu compromiso coa defensa dos dereitos das profesionais da cultura. Pola súa banda, Laura Seara ofrecerá a visión das políticas de igualdade aplicadas ao ámbito cultural e ás organizacións.

A actividade enmárcase nas accións promovidas polo Concello ao abeiro do Pacto de Estado contra a Violencia de Xénero, coa intención de abrir un espazo de diálogo sobre a importancia da cultura como ferramenta para avanzar cara á igualdade.

O coloquio permitirá revisar o papel que desempeñaron as mulleres ao longo da historia do cine, reivindicar a achega de pioneiras e creadoras que abriron camiño e analizar como evolucionou a representación feminina na gran pantalla. Tamén se porán sobre a mesa as desigualdades que aínda existen detrás das cámaras, tanto no acceso aos postos de dirección e creación como no financiamento das producións.

Con esta iniciativa, o Concello de San Xoán de Río reforza a súa aposta por promover a igualdade a través da cultura, favorecendo espazos de reflexión e debate abertos á cidadanía.