A Deputación de Ourense colabora nos traballos de conservación do Santuario das Ermidas

O Santuario das Ermidas, coñecido como a «perla do barroco» e declarado Ben de Interese Cultural, continúa coas actuacións de mantemento que lle permiten conservar o seu esplendor. A Deputación de Ourense sumouse a estes traballos, centrados en tarefas de limpeza, tratamentos específicos e consolidación de elementos soltos, segundo explicou a restauradora Sofía Anta, responsable das intervencións actuais.

O presidente provincial, Luis Menor, visitou o templo xunto ao alcalde do Bolo, Miguel Ángel García, o tenente de alcalde, Alberto Vázquez, e ao administrador diocesano da Diocese de Astorga, Francisco Javier Gay Alcain, nun percorrido guiado polo custodio José Vega. Alí coñeceu o labor que se realiza nun dos principais recursos turísticos da zona, polo que pasan cada ano máis de 8.000 persoas.

Menor destacou «o labor social que aquí se realiza a prol dos máis vulnerables» e comprometeuse a que a Deputación continúe apoiando tanto a conservación monumental como o labor humano que se desenvolve arredor do santuario. O administrador diocesano agradeceu a colaboración e subliñou o valor «relixioso, artístico e natural» dun espazo capaz de unir fe e cultura nun mesmo lugar.