Once mulleres que se negaron a desaparecer da historia

A memoria das mulleres que resistiron durante a Guerra Civil e o franquismo ocupará o centro da escena cultural do Barco de Valdeorras este venres 13 de marzo. O Edificio Multiusos acollerá ás 19:30 horas a presentación do libro «Traballadoras da liberdade», unha obra que rescata as historias de once mulleres que mantiveron as súas ideas de liberdade e compromiso nun dos períodos máis duros da historia recente.  

O acto contará coa participación de Rosa M. Ferreiro, responsable da selección de textos e coordinadora da edición; Cristina de la Torre, encargada da revisión de textos e estilo; e Domingo D. Docampo, editor do libro. Tamén intervirá Orlando Luis A. Saavedra, concelleiro de Igualdade do Concello do Barco de Valdeorras.  

A publicación propón un exercicio de recuperación histórica que sitúa no primeiro plano a traxectoria de mulleres que, en moitos casos, quedaron fóra do relato oficial. A través dos seus testemuños e das ilustracións de Manel Cráneo, a obra reconstrúe as vidas de protagonistas que dedicaron anos de loita á resistencia política e á defensa da democracia.  

Segundo explican as persoas impulsoras do proxecto, «este libro nace da necesidade de cubrir os baleiros que a historia oficial deixou, outorgando o protagonismo que merecen aquelas que traballaron, a miúdo na sombra, pola liberdade que hoxe desfrutamos».  

A obra recibiu ademais o Premio Luisa Villalta a proxectos pola Igualdade da Deputación da Coruña, un recoñecemento que destaca o seu valor na recuperación da memoria histórica desde unha perspectiva de xénero.  

Durante a presentación proxectaranse fragmentos de entrevistas coas mulleres protagonistas do libro e abrirase un coloquio co público no que se abordará a importancia de incorporar a perspectiva de xénero na reconstrución da memoria colectiva. A entrada ao acto será libre ata completar aforo.