A empresa encargada de esta mellora será “Repoblaciones, obras y canalizaciones, SLU”. As obras adxudicáronse en algo máis de 284.000 euros, e contan cun prazo de execución de 10 meses desde a firma do contrato. A Deputación Provincial achega unha subvención de 70.000 euros. O orzamento inicial era de 291.000 euros.
Os servizos que se van realizar con este proxecto son previos á terceira fase da rehabilitación do BIC do Castro, que se pretende executar unha vez remate a instalación dos servizos e que suporá a terminación dos traballos de recuperación da vila-fortaleza desenvolvidos nos últimos anos.
As actuacións de rehabilitación que se levaron a cabo ata agora, correspondentes as fases I e II, serviron para recuperar os espazos inmediatos á Torre do Homenaxe e o interior da primitiva muralla. Agora pretendese a remodelación dos diferentes servizos existentes no resto da contorna que compón o núcleo do Castro, e que é todo o ámbito previsto para a terceira fase da rehabilitación do conxunto.
Procederase a repoñer e mellorar a instalación actual de abastecemento, realizada en varias fases ao longo do tempo e substituíndoa cunha rede nova que incorpore todos os rexistros e derivacións necesarios e cuxo trazado se adecúe ás obras de urbanización previstas na contorna. No que atinxe á rede eléctrica de baixa tensión, vaise soterrar a instalación aérea existente, tanto a de iluminación como a de forza, adecuándoa ao uso peonil da contorna.
O trazado proxéctase para adecuarse á nova disposición de acometidas, rexistros e puntos de iluminación pública previstas no proxecto de rehabilitación da fase III do núcleo. Do mesmo xeito que a liña de baixa tensión, vanse soterrar as liñas de telecomunicacións, ordenando as acometidas ás diferentes parcelas do ámbito en relación ao resto de subministracións.
Por último, vaise repoñer e mellorar a instalación actual de saneamento facéndoa operativa e incorporando as derivacións e rexistros necesarios, adecuándoos aos trazados previstos no proxecto de rehabilitación. As zonas de intervención son principalmente tres. A primeira, a coñecida como améndoa medieval, actuando nos camiños que completan tanto a conexión en estrutura radial coa Torre da Homenaxe como os aneis perimetrais que o rodean.
Tamén se actuará no paseo do Castro, vial que representa a principal comunicación do núcleo coa súa contorna, ao ser o paseo que une a igrexa co Pazo do Castro. Por último, actuarase nos camiños que comunican o núcleo coa ladeira norte, na que se atopan unha parte importante das vivendas que compoñen o lugar, moitas delas construcións tradicionais de interese que forman parte do conxunto histórico tradicional do Castro.
