José Fernández, presidente da sección de arqueoloxía do Instituto de Estudios Valdeorreses -IEV- fixo un repaso por algunha das anécdotas xurdidas en torno á película «Valdeorras pueblo a pueblo», filmada en Super8 e producida polo IEV en 1975.
Este venres os valdeorreses tiveron a oportunidade de ver a proxección da película, no marco das «Tertulias do IEV», un traballo que amosa a historia dos pobos e casas da época, en beta.
O Casino do Barco foi o lugar elixido polo Instituto de Estudios Valdeorreses para a estrea da película que ten os pobos de Valdeorras coma protagonistas. O presidente do IEV, Aurelio Blanco Trincado e o presidente da sección de Arqueroloxía, José Fernández, presentaron o acto no que non faltou a poesía de Fernando Santos, recitada por el mesmo.
Preguntado por este traballo, o responsable da sección de arqueoloxía, José Fernández, máis coñecido como «Pepe, o das pedras», destacou que esta película «fíxose nunha época onde o Instituto de Estudos Valdeorreses tiña un gran equipo, con Ferrer Sierra e Enrique Fernández, arqueólogo». Segundo indica, «parece ser que é unha copia que se fixo para Ramón Lopez Caneda. Despois, Roberto Iglesias e Servando Gómez a esconderan e Aurelio tivo a ilustre sorte de atopala».
Nunha conversa con Onda Cero Valdeorras, puxo en valor o importante patrimonio que ten a comarca de Valdeorras, non sempre coñecido ou ben preservado. «Foi unha época moi gloriosa e de moitos éxitos para o Instituto, onde catalogamos máis de 40 castros». Durante ese periodo, os arqueólogos realizaron numerosos estudos de campo e maquetas de todas as pedras, as cales estiveron moitos anos na Casa Grande de Viloira, e que na actualidade poden verse nas diapositivas.
Proba do inxente traballo feito, sinala, e que dende entón só apareceu un castro por riba de Pumares «e pouco máis». O principal lamento ten que ver coa falla de conservación de todo este vasto patrimonio. De feito, asegura que «moitas cousas xa non están».
Ademais da proxección, esta actividade incluiu unha declamación poética a cargo de Fernando Santos, membro do IEV, e charlas sobre as excavacións arqueológicas cunha exposición sobre o grupo Os Escarbadores e unha intervención sobre o patrimonio da comarca.
Así foi a presentación do acto por parte de Aurelio Blanco Trincado, presidente do IEV