A Praza do Concello do Barco de Valdeorras acolleu a II Feira da Formación Profesional do IES Lauro Olmo, unha xornada na que o centro educativo decidiu abrir as portas da súa formación ao público. A través de obradoiros, demostracións en directo e conversas co profesorado e alumnado, amosouse o potencial práctico e profesional da FP, unha opción cada vez máis demandada e valorada.
Coidados Auxiliares de Enfermaría: profesionais moi demandados
As docentes Ángela Iglesias e Aida Núñez presentaron o ciclo medio de Coidados Auxiliares de Enfermaría, destacando que é un ciclo «con moitas saídas profesionais e fácil acceso desde a ESO». A súa relevancia queda clara pola alta demanda na comarca: «hai centros que teñen que contratar xente sen titulación porque non hai suficientes titulados», sinalaban.
Este ciclo permite traballar en residencias, hospitais, centros de día ou clínicas dentais, e tamén serve de trampolín cara a ciclos superiores da rama sanitaria. O alumnado é variado, desde xente nova que accede dende a ESO ata persoas adultas con experiencia laboral. «Iso enriquece os grupos e xera unha dinámica moi positiva», comentaban as docentes.
Electromecánica e Mantemento de Vehículos: rigor e versatilidade técnica
No stand de Electromecánica, o profesor David Trincado puxo en valor tanto o ciclo medio de Electromecánica de Vehículos como a FP básica en Mantemento de Vehículos. A formación abrangue desde reparación de coches ata maquinaria pesada de canteiras, sector con alta presenza en Valdeorras: «Abarcamos moitos campos: talleres, loxística, servizos auxiliares, incluso canteiras».
O profesor destacou a necesidade dun cambio de percepción: «Isto non é Fast & Furious, é estudar, formarse e traballar con rigor técnico». Lembrou tamén que, aínda que custa atopar perfís comprometidos, «os que rematan saen ben preparados para o mundo laboral».
Atención a Persoas en Situación de Dependencia: vocación e empregabilidade
A docente Carmen explicou o ciclo de Atención a Persoas en Situación de Dependencia, unha formación «completa a nivel asistencial, sanitario e psicosocial» con preto do 100% de empregabilidade. Destacou que, aínda que é pouco coñecido, debería terse máis en conta: «Falta moita xente nos centros residenciais e este ciclo forma profesionais altamente necesarios».
Ademais da atención en residencias, forma para o apoio domiciliario, un servizo esencial para que persoas maiores poidan seguir vivindo nas súas casas: «Os técnicos cobren as necesidades dos dependentes no seu propio fogar». A motivación é clave: «Hai alumnado de todas as idades, pero todos teñen en común a vocación por traballar con persoas».
Perruquería e Estética: creatividade e profesionalización
As profesoras Cristina Martínez e Alba Ayer presentaron tanto o ciclo medio de Perruquería e Cosmética Capilar como a FP básica de Estética. Esta última permite acceder á formación a persoas que non completaron a ESO: «Poden obter unha titulación e seguir formándose».
Os obradoiros abranguen desde peiteados e cortes ata maquillaxe, coidado de mans e uñas. A demanda creceu nos últimos anos, e tamén a diversidade do alumnado: «Antes eran maioritariamente mulleres, pero agora hai moitos rapaces interesados na barbería e no estilismo masculino».
Administración e Finanzas: versatilidade para o mundo laboral
A profesora María José explicou as posibilidades dos ciclos medio e superior de Administración e Finanzas. Desde xestión empresarial ata traballo en banca, seguros ou administracións públicas, este ciclo «ten moitísimas saídas profesionais, porque administrativos fan falta en todas partes».
Unha das vantaxes do IES Lauro Olmo é ofrecer a posibilidade de continuar estudos dentro da mesma familia profesional, permitindo pasar do ciclo medio ao superior e mesmo acceder á universidade. «É unha opción sólida para quen busca estabilidade e versatilidade laboral».
Vitivinicultura: tradición e innovación ao servizo do territorio
A docente Viviana Fucci destacou o carácter singular do ciclo superior de Vitivinicultura, perfectamente adaptado á realidade de Valdeorras: «Formamos alumnado para traballar na viña e nas adegas, como técnicos, encargados ou responsables de control de calidade».
Este ciclo é dual, cunha porcentaxe elevada de formación en empresas: «Ata o 50% do ciclo desenvólvese en adegas reais». Ademais, inclúe formación específica en cata, co uso de aromas e prácticas sensoriais. A profesora animou á mocidade da comarca a aproveitar esta oportunidade de futuro nun sector estratéxico e con demanda laboral.
Un modelo de FP con futuro
A II Feira da Formación Profesional do IES Lauro Olmo deixou claro que a FP é unha opción viable, atractiva e con saída laboral, e que está adaptada tanto ás necesidades sociais como ás demandas do mercado. Desde a saúde ata a estética, pasando polo sector agrícola ou industrial, os ciclos formativos ofrecen formación práctica, accesible e con proxección. Sen dúbida, un modelo de ensino que merece ser coñecido, valorado e apoiado
