O Conservatorio de O Barco despediu o curso cun concerto no Teatro Lauro Olmo

O Teatro Lauro Olmo acolleu este mércores o concerto de fin de curso do Conservatorio Profesional de Música de O Barco de Valdeorras. A cita foi un éxito: o patio de butacas estivo case cheo e o público gozou cunha actuación na que se fixo patente o esforzo e a dedicación do alumnado ao longo do ano.

O programa arrancou co conxunto infantil de grao elemental, que interpretou Welcome to the World e Portugal, de Jacob de Haan, ademais de Furioso, de Robert W. Smith. A continuación, Iria Rodríguez Ferrero subiu ao escenario combinando voz e piano para versionar Black Holes, da banda The Warning.

O Coro interpretou o solemne Lacrimosa de Mozart e, a continuación, a coñecida peza tradicional galega Se chove. Os máis pequenos do conservatorio incorporáronse para cantar esta última canción, acompañándoa cunha pequena coreografía.

O ensemble de saxofóns comezou coa coñecida melodía de The Simpsons, arranxada por Philippe Marilia, e continuou con dúas pezas do compositor Pedro Iturralde: Pequeña Czarda e Suite Hellenique.

A orquestra tamén tivo o seu protagonismo cun repertorio clásico composto polo Concerto Grosso Op. 6 de Corelli (arranxado por José Romero) e o Cuarteto Op. 2 n.º 6 de Haydn, interpretado con gran solvencia.

O peche correu a cargo do grupo folk, que puxo o broche final cun toque enxebre e cheo de ritmo grazas ás pezas Bágoas na brétema, de Emilio Mesías; Polca de Vilagarcía, de Os Campaneiros; e o vibrante Busindre Reel, de Hevia.

Foi unha tarde para gozar da música en directo e para constatar a calidade do traballo que se realiza no conservatorio do Barco ao longo do curso.