O Barco estrena unha aplicación para reservar a pista municipal de pádel

Desde esta semana, os afeccionados ao pádel de O Barco de Valdeorras dispoñen dunha nova ferramenta dixital para reservar a pista municipal. O Concello puxo en marcha unha aplicación móbil que permite xestionar as reservas de forma sinxela, cómoda e gratuíta.

A app, xa dispoñible para Android, ofrece un sistema intuitivo co que calquera usuario maior de idade pode reservar dúas sesións semanais. No caso de menores, será o titor legal quen debe facer a xestión e asumir a responsabilidade da mesma. As reservas son persoais e intransferibles, aínda que, se hai dispoñibilidade, tamén se poderán realizar de maneira instantánea. Ademais do sistema de reserva en liña, os usuarios tamén poden facelo de maneira presencial no pavillón municipal nos horarios nos que haxa conserxe.

Unha vez feita a reserva, o sistema xera un código QR e activa unhas pestanas dixitais que permiten abrir a porta da pista e prender as luces, no caso de que o horario sexa nocturno. As franxas horarias dispoñibles van desde as 7:30 ata as 22:30 horas, todos os días da semana, festivos incluídos. O Concello advirte de que poderá anular calquera reserva por razóns de interese xeral ou no caso de detectar irregularidades no uso das instalacións.