O 15 de abril, no concello do Bolo, celebrouse a Festa da Vitela. Este evento gastronómico, no que a protagonista é a carne de tenreira dos pastos boleses, leva celebrándose 10 anos en Sábado Santo, data na que remata a Coáresma.
Máis de 700 persoas déronse cita no pavillón do Bolo, para saborear a apreciada carne de tenreira da comarca. No banquete serviuse, aparte da rica vitela, unha contundente sopa de fideos feita co mollo da vitela, lacón, androlla, chourizos, garavanzos e patacas que se comerían despois da sopa. De sobremesa roscón. Hai que sinalar, como nos apuntaba Manuel Corzo, alcalde da localidade que, "todos os produtos que se poñen na mesa na Festa da Vitela son do Bolo”, incluío o pan, viño e licores que tomaron na sobremesa.
Ademais de veciños do concello e visitantes de diversos puntos da xeografía galega e incluso nacional, a esta décima edición da Festa da Vitela asistiron o senador Avelino García Ferradal, o conselleiro de Economía, Emprego e Industria, Francisco Conde, membros da corporación, así como representantes doutros concellos e da vida política da comarca, que compartiron a mesa presidencial co alcalde, Manuel Corzo.
A comida e baile posterior estivo amenizada pola charanga Nova Terras de Trives.