Deporte, pancetada e música na celebración do San Xoan en Viloira

Co cheiro das sardiñas e para facerlle ganas ó peixe propio destas datas e a panceta, que asaron os membros do CD Barco, puxéronse en marcha cerca de 200 camiñantes e corredores na tarde  do 23 de xuño desde a praza de Viloira para facer unha  ruta de 4,5 km con chegada na mesma praza. Ao remate invitouse a todos os participantes á pancetada.

Amplo programa de actividades organizadas polas concellerías de Cultura e Deportes do Concello barquense no que non faltou o deporte, a música, a comida e o lume que acompañou a velada como parte esencial desta noite máxica.

En torno as 10  Pepe Penabade  foi o encargado de abrir a parte lúdico festiva cunha actuación na que o humor e a cultura tradicional van da man no seu espectáculo “Afiador e paragüeiro”. A continuación actuou o grupo “Os Primordiais”, un dúo musical diferente onde os distintos estilos fixeron bailar a todo tipo de público. Ademais contouse coa colaboración dunha parella experta de danza, Miguel Sotelo e Andrea Cabanelas, que foron os encargados de guiar os diferentes bailes da noite.

A medianoite foi de novo o momento de Pepe Penabade para reunir aos presentes en torno á queimada. O actor foi o encargado de sacar o meigallo da noite facendo partícipes a todos os asistentes dun conxuro de queimada tradicional pero con toques de humor. Unha vez rematado o conxuro a música de Os Primordiais e o baile volveron a praza para quedarse ata o remate desta noite máxica.