A visita á mina romana e á « Boca do Monte» ou os obradoiros de acuñación de moeda e escritura foron outras das actividades da primeira xornada de ‘Montefurado Terra de Romanos’
Coa cea e festa romana remataron as actividades desta xornada de sábado, na que Montefurado volveu a recrear unha época que tantos vestixios deixou na vila. Máis de 100 persoas déronse cita na praza para dar conta das viandas que se serviron na cea popular. A maioría ataviados con traxes da época.
As 11:30 horas celebrouse unha ruta divulgativa do patrimonio romano de Montefurado. Os asistentes saíron da Praza da Igrexa para percorrer os a escavacións, a mina e mesmo o túnel romano — A Boca do Monte— feito para desviar o río Sil e así recoller mellor o ouro. «Caio Virio Frontón» foi o encargado de guiar á singular «tropa» nas artes do coñecemento. O longo do traxecto, explicouse como funcionaba a mina, a historia da localidade, a da igrexa, así coma sucesos que ocorreron ó longo da historia.
Xa pola tarde, houbo campionato de bolos celtas e dous obradoiros na praza. Un de acuñado de moedas—acuñouse o metal e explicouse coo era o proceso de creación— e outro de escritura romana —como escribían os romanos e materiais que usaban—.
Para mañá agárdase outra xornada cultural na que as artes da guerra, a conformación dos exércitos e as conquistas dos romanos serán o eixo principal das actividades. Será despois da misa na igrexa de San Miguel de estilo rococó.
Esta festa comezou en agosto de 2012 para xuntar ós veciños e ademais que tivese un certo carácter cultural. Tamén que servise para dar a coñecer a vila xa que «está medio esquecida e é unha das marabillas de Galicia», aseguraba Alberto Núñez, un dos organizadores ós micros de Radio Valdeorras Onda Cero. Esta celebración tivo continuidade até 2015, data na que se deixou de facer e que se retoma de novo este ano a petición dos veciños.
Montefurado Terra de Romanos cultura e gastronomía.